جميلة في كل أحوالك
جميلة في كل أحوالك
ودق القلب خلخالك
وبين الناس أنا عايش
وأموت لو ضمني وصالك
كأني في الحياة مجذوب
وماشي فيها بالمقلوب
أعيش بينهم وأنا ميّت
وأموت -بينهم- في أحضانك
برمش عنيا اغنيلك
أشوف كامل تفاصيلك
وتطلع شمسي من ليلك
وليلي يطول مع غيابك
ياريتني مراية بكفوفك
أنوَّر كل ما أشوفك
مفيش غيرك يبُصلها
ومفيش غيري يعودهالك
ياريتني الكحل ع العِينة
وحنّة بتترسم زينة
وروج من كل تلوينة
غويشة وحضنها دراعك
وعُقد الماس على جيدك
وخاتم زينته من إيدك
وجوز حلقان من اللولو
ياقوت أحمر ومرجانك
ياريتني قماشة والخيطة
وطرحة عليها برنيطة
وتوب ملفوف ب 100 لفة
حرير مخصوص لفستانك
ياريتني وسادة وأريكة
وصوت راديو بمزيكا
وريحة البُن وبخاره
وأنا دايب في فنجالك
ياريتني الظل من شمسك
تبصي يمين أكون حارسك
وأكون في الكف هوَّاية
دا لو بصيتي لشمالك
أماني النفس جايّلها
ولكن مين في يوم نالها؟
نلف، ندور في دوّامة
نجيت منها؟!، تكون هالك
.
#خواطري
تعليقات
إرسال تعليق